زِمین چاک چاکِم

بیا ساقی زِمین چاک چاکِم

وِ دینِم سی نِمی بارو هِلاکِم

تو میرآویی مِ چارَک دارِ ژاری

تو گلزاری مِ دشتِ شورهَ زارِم 

دو بیت از یک ساقی نامه لری

حِساو کِتاو

تَرسِم که حِساو کِتاوی دِ کار بُوءَ

یا روزِ عِتاو خِطاوی دِ کار بُوءَ

دُو دونیا هَم بُوءَ وِ پارتی بازی

گوش نِیرَن اَگَر جواوی دِ کار بُوءَ

بَردِ اَجَل

سُختمَ درمو نمیحا درد مِ

مُردَ دلِ شو کِزِ ولگردِ مِ

یخ چی تَشَ وَختی که بِینَه خوشِ

ساعتی وِ رونه لَشِ سردِ مِ

کَس چی مِ بیزارِ دی دُنیا نِوی

قِیسِ دِلِم عاشقِ لیلا نِوی

حُونَه خیالاتِمِ گُم کِردِمِ

توز چی مِ وِیلُونِ صَحرا نِوی

در وِ دَری گُور وُ گُمِم ها رُوءِم

چی دُمِ چِز تَلِ طُمِم ها رُوءِم

بِستِمَ بار کولهَ سی ناکجا

هُمسَفَرِ سایه خومِم ها روءِم

بَردِ اَجَل کِردَ پیا پا مِنِ

جور فِلَک شیوَنَ دُنیا مِنِ

اُورِ سیی سِلپِسَه دی آسِمو

پُوشَنَه آسارهِ یِ شُویا مِنِ

کَم بَکارِم بیخودی وُ خُت نیا

کُم نامُسَلمو بی که وِت گُت نیا ؟

یا بیا وا ای دلِ مِ تا بَکُ

یا بیا هیچ موقع تُونِ بُت نیا

بیل خُمِ آمُختَه غَریوی بَکِم

هُوکارَ وِ هَر سی نِصیوی بَکِم

ایقهَ دو رنگی دیمهَ دی عُمرِ گَن

وَخته که وا آیینهَ هَم قی بَکِم

بی تو چِطوری سِیلِ دوُنیا بَکِم

بالِ خیالِ وِ کُجا وا بَکِم

بَسکه نِشِسِم پَرِ مِ کورهَ بی

تا چَنی وا سیکِ قَفَس تا بَکم ؟

اِی هَمَه اُمیدِ مِ تا کِی چِنی

سایه مِ وا تیرِ جَفا میزِنی؟

دونِتِ می پاشی وِ جایی هَنی

دُومِتِ هَر جا کِه مِنِم می تِنی

تیلِ اُمیدیامِ دِ ریشهَ کَنی

شُونِمِ کِز کِردی وُ بی کِش مَنی

شوخِ نِمَک دارِ (عزیز) آخِری

اِسمتِ دِ دَفتَرِ دِل پاشَنی

حونَ دوسِ

یَ یِ عُمرهَ که وا بالِ خیالم

وِ تُرِ دل که میرَ بونه دوسِ

تموم کیچه یا دُنیا نِ گشتم

دِ بخت گن نجوستم حونَ دوسِ

دورونِ جِوونی

دورونِ جِوونی چی کِل زِل  بی وُ رَت

باقیش یَواش وُ بی ثمر کِل بی وُ رَت

هر عاقلی دِ آخِر عُمرِش مِیینهَ

دنیا دِ قَپِش چی بالِنِه ی وِل بی وُ رَت

تا چَرخِ فِلَک وِ کُومِ نامردونَ

تا چَرخِ فِلَک وِ کُومِ نامردونَ

اُفتائِه وِ لُورِ خِیر کِی آسونَ

دیمه یِ ذِغال فِروشی یه پَنجا ساله

چی زَنگی دی خُورموئَه سرگردونَ