کرونا
#شعر_طنز_کرونا
کرونا والله خو بی اُمایی
دو بیشتر عیدِ نو بی اُمایی
اُمایی حونه نِشینم کردی
بیزار دِ دنیا وُ دِ دینم کردی
اَر نمیمایی دِ ای وَختِ عید
دِ ای بی پیلی وُ روزیا سختِ عید
میحاس چی هر سال جیوِ پَتینِم
شرمندهم بکه ، سیکی بَشینم
پَکَر بَشینم چی بُؤه مُردَه
بارَ صد جورِ بورِم وِِ گُردَه
سی هوزِ ژارُ چَن خویی داشتی
خُت خَوَر ناری والله گُل کاشتی
تا تو اُمایی فوری جا وِ جا
قسطِ وامیا اُفتا وا دِما
کُل مَچِد روُیا مِری کافِر بین
شمال وُ جنوب بی مسافِر بین
دِر نمیارِم سَر دِ ای کاریا
زنجِفیل بی وِ بَهرِ پیل داریا
داروخونهیا کُل پیلدار بیِن
کار وِ دسیا کُل بیکار بیِن
زَنیا پِنجِل کُل وَسواس بینه
ظرفیا روحیشو چی الماس بینه
کرونا والله تو چَنی نازی !!!
دِ ویرِمو بُردی میهمونی بازی
چَنی خویی سی مَردِمِ بی پیل
امسال عید اُما ، امّا بی آجیل
تُو مَردِمِ کُل نیایی وِ یَک
دِپَهلونیت ذرهی نارِم شَک
کرونا ، هَر چَن نمیای وِ چَش
داری کو میکی لَش وِ سَرِ لَش
دِ هَر میدونی روزِ قی بُردی
ریداریا دنیانِ کُل دِ ری بُردی
چَنی لَنجویی ، چَنی زورداری
عالِم وُ آدِمِ کِردی فِراری
میخونه هَنی دِ سَر آباد بی
مَردِم شَنگول وُ الکل آزاد بی
دَس دِیِه گَن وُ ماچ کِردِه عِیوَه
دوسی بی نِشو ، محبت غیوَه
هیچکس دِ صو خوش نارَه خَوَر
همه مو کِسِل ، همه مو پَکَر
ماسک وُ دسکشیانِ نیس بِرَک برده
ای پیل ، چی میکی ؟ ای صحاو مُرده
دنیا سی بی پیل یِ سَر چِنینَه
پیل دار دِغ کِرده دِ قِرنطینه
شاسی بُلَنیا کُل خاموش بینَه
خارج رَتِنیا فِراموش بینَه
مردِم کِی میرَن دیه وِ زیارَت
دِ قُم وُ مشهد کُل بُؤَن غارت
امامزایه یا کُل تعطیل بینه
خادِمیا مَچِد کُل بی پیل بینه
بازارِ رفت وُ آمد چه سردَه!!!
راننده تاکسی حالی میگردَه
اسکناسیانِ وَختَه دیِم تَش
هر چی میسونِم مُؤَن کارت بَکَش
کسی دِ حُونه دِر نِمیاره سَر
خیاوونیا خلوت ، چی سیزَهوِدَر
دِ یَک اُفتان خانواده مِ هَم
دیه صله رحم ، بی صله رحم
هَر کسِ کُشتی ، بی دعا و نِماز
دِ قورِ قیلی میکَنِش دراز
نه صِلَواتی ، نه فاتحه خونی
نه شاهی اُما ، نه رَته خونی
نه فشار قوری ، نه پُرسِ پُویی
مُردِه هم ناره دیه رَنگ وُ بویی
مَر تو چینی بی ، کرونا لیوه؟
دِ کجا اُمایی ، شارِت بَشیویه؟
اول فصـــــــــل بهاره ، زی رو
اَر دلت نیسا وات بوئم قی ، رو
اَر زی نرویی وا سوره یاسین
مِفتِم دِ دُمِت تا چین وُ ماچین
دِ شهر ووهان رَنِ کردی گُم
وا گِم وُ گُردَه اُفتایی دِ قُم
کرونا حرفی میحا وِت بُؤم
دیه شَکَت بیمه ، مِ هم ها رُۅم
خؤه زیتری دِ ایرو رویی
دِ ای کشور دَلیرو رویی
کی ایرانیا سِزاوار بینه
همه دِغ میکن دِ قرنطینه
#عزیز_نادری
فروردین ۹۹
@AzizNaderi
