اشعار لری و فارسی  عزیز نادری

چَنی جوُر ای دلِ حَسرت نِصیوم؟

یَ چَن دور ای دلِ حَسرت نِصیوم؟

بَکُ رَحمی وِ ای پایا پَتینِم

مِنِ نوُر* ای دلِ حسرَت نِصیوم

هَنی سَر بو وِ هار وُ رو که وا مِ

نَکی شور* ای دلِ حَسرَت نِصیوم

چی اول دیَ مِثِ آیینه نیسی

بییَ زوُر* ای دلِ حَسرَت نِصیوم

مِنِم وُ دآ اُولِ یِ لا غُوایی*

وَنَم بُور* ای دلِ حَسرَت نِصیوم

وِ دینم اَر مُسلمونی چِنینَ

مُؤِم گوُر*، ای دلِ حَسرَت نِصیوِم

مِ دونِم کِی دِ ایی وِلگَشتِ مِفتی

دِ تَه قوُر، ای دِلِ حَسرَت نِصیوِم

دِ داغِت پُر کِپِ هَفت آسِمونِم*

بییَ اُور، ای دلِ حَسرَت نِصیوِم

صِلا داری بَرَنجونی "عزیزِ"

نه ایطوُر، ای دِلِ حَسرَت نِصیوِم

عزیز نادری------------- تَشِ دل

*نوُر:نَبَر

*نَکی شوُر:مشورت نکنی

*زوُر: زِبر

*یِ لا غوُا: یک لا قبا

*وَ نَم بوُر: آن را هم بِبَر

*گوُر: گَبر ، گوُری: گَبری

*پُرکِپِ هَفت آسِمونم: واژه ای که تراکم بسیار شدید را

بیان کند،منظور تراکم ابر در سرتاسر آسمان است.